اعمل اي حاجة بس كون سعيد
إشتري علبة شوكولاتة مستوردة غالية و كلها.
إلعب لعبة مالعبتهاش من و إنت صغير.
إعرق و إنهج و حس إنك عايش.
إطفي نور أودتك شغل التكييف إسمع أكثر مزيكا بتحبها و إسرح معاها.
بص لأهلك و عرفهم قد إيه بتحبهم.
بص للي تحتك و إعرف قيمة كل حاجة معاك.
بص للي فوقيك و إعرف إن رغبتك إنك تبقى زيهم هي اللي مدية طعم لحياتك.
إستمتع بشمس الصيف.. بصلها و قولها إنك مش كارهها.. حتى لو عرقتك و لزقتك..
روح أقعد على البحر.. دخل رجليك في الرمل.. و خرجها.. بطل تفكير.. و إبدأ حس..
في الشتا إنزل تحت البطانية و حط كوباية الشوكولاتة السخنة جمبك.. إبتسم و غمض عينيك و نام.
إشتغل لحد ما تحس إنك مت.. نام ثاني و إشحن و روح موت نفسك ثاني..
وإعرف إنك زودت حاجة للدنيا ماحدش كان هيزودها غيرك.
إفتح شباك العربية و إطلع على طريق سريع خلي الهوا “يطس” في وشك
.. صرخخخخخخخ.. بس إتأكد إنك مش داخل على لجنة .
خلى اللي يكره يكره و اللي يشتم يشتم وإعرف إنهم مضيعين وقتهم.
إتأكد إنك لو عارف إنك هتموت بكرة هتعمل نفس اللي بتعمله دلوقتي.
حب جامد قوي حتى لو حبك مش هيستمر لحد بليل.
كل أكلة حلوة قوي.. بس ماتخليهاش تشبعك.
إشرب مشروب دخلت المطبخ و إخترعته و لو ماعجبكش إرميه في الحوض
و إنزل إشرب حاجة ثانية بتحبها.
أكسب نفسك و حب حد بيكرهك.
إكسب نفسك ثاني و حب حد بتكرهه.
إكسب نفسك ثاني و إنسى حد لسه بتحبه من غير ما تكرهه.
لما تقابل واحد مش فاكر إسمه و مش بتسلم عليه عادة خده بالحضن و قوله واحشني جدا يا معلم..
جرب أكلة جديدة في مطعم فخم.. ثمنها يخرب بيتك.. و روح و إنت مبسوط.
إلبس أحلى لبس عندك و إنزل إمشي في الشارع و إنت فارد ظهرك..
و ماتحطش إيديك في جيبك خليهم أحرار.
إرقص حتى لو في أودتك و إنت قافلها بالمفتاح.. ممكن تغني كمان و إنت ماسك الفرشة على إنها ميكروفون.
إفتكر قبل ما تنام كل الكلام الحلو اللي سمعت الناس بتقوله عنك.
كل ما تلاقي حد بيحكي عن مشكلة دورله عن الجانب المشرق فيها..
مهما كانت عويصة.. طلعله فيها فوايد و باركله.
كل ما حد يقولك إزيك عامل إيه؟ قوله "الحمد لله مبسوط اوووي"..
قولها بسرعة من غير ماتفكر و إبتسم.. لوحدك هتتبسط فعلا.
شوف إيه أكبر مشكلة في حياتك.. فكر في أسوأ حاجة ممكن تحصل بسببها
و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا.
سافر حتة ماروحتهاش قبل كده.. صورها و صور نفسك فيها
.. خد منها تذكار و إرجع ثاني نام على سريرك و عرفه إنه وحشك.
جيب هدية لحد بتحبه من غير مناسبة.. و إديهاله في عدم إهتمام كأنك ماعملتش حاجة غريبة.
ماتغضبش مهما حصل.
أشكر كل الناس بسبب و من غير سبب.
لو حد شتمك حط ده في تانك البنزين بتاعك علشان يبقى طاقة تحركك لقدام.
لو الناس بعدت عنك إعرف لأنكم مش زي بعض.. لا هما وحشين و لا إنت وحش
.. إنتم بس مش زي بعض.. و إتبسط إنك مش بتضيع وقتك معاهم.
إنزل من بيتك بشبشب و شورت من غير ماتسرح شعرك..
و إتأكد من جواك إنه عادي جدا.. أنا مش مهتم.. و خليك واثق من نفسك.
بص لإمبارح.. و شوف إتعلمت منه قد إيه..
خطط لبكره بس إوعى تخاف منه .. إزاي تخاف من حاجة إنت اللي بتبنيها أصلا
.. حاجة لسة ماحصلتش و ماحدش في الدنيا يقدر يعرف إيه اللي هيحصل فيها..
إستمتع بالنهاردة كويس.. لأن كل نهار هيبقى إمبارح بتاع بكرة زي ما كان بكرة بتاع إمبارح..
إستحمى في نص ساعة.. خلى المية تنزل على وشك و إسمع صوتها كويس.
بدون سبب إبعت رسالة لأي حد بتحبه قوله حاجة حلوة.
إتبسط.....عشان تعيش حياة حلوة
قد إيه صعب تكون ضلمه من حواليك.. وانت عمال تزرع الامل جوه قلبك
يكون لك جذع تسند عليه.. وتلاقيه اتقطم وبيقولك مش قادر اتحمل
متكونش لاقي شبر تتنفس منه.. ولسه عمال تجرب تلاقي منفذ
تحس فجاة انك واقف لوحدك.. مش عارف تحط منطق!!
كالعادة.. تبص في السما.. تلاقيها عاليه.. والارض من تحتها شايله كتير وهادية..
كأنهم بيقولوا لك.. فكر في اللي خلقك وخلقنا.. حتى لو محدش مساعدك..
فكر في قدرته في كل تفصيله في حياتك.. والكون كمان من حولك..
"اطمن.. انت بس مستعجل
عندما تتكاثر المصائب يمحو بعضها بعضاً
وتحل بك سعادة جنونية غريبة المذاق
وتستطيع أن تضحك من قلب لم يعد يعرف الخوف !"'
ليست هناك تعليقات:
إرسال تعليق